Slawische Nacht in Leipzig
Presse
Serbske Nowiny 4.2.2010 zur 3. Slawischen Nacht am 5.2.2010
Na 3. słowjansku nóc
Pólski klub w Lipsku wuhotuje zajutřišim, pjatk, 3. słowjansku nóc.
Alfons Wićaz je so z jeho zastupjerjom Bartłomiejom Kiszku rozmołwjał.
Waš klub organizuje zetkanja Słowjanow w Lipsku. Byšće jón skrótka předstajił?
B. Kiszka: Pólski klub je organizacija, kotraž zajimuje so za pólsku a słowjansku kulturu.
Tuž přihotuje tež tajke zetkanja. Chcemy Słowjanow z wosebitymi swjedźenjemi jednoćić.
Kelko Słowjanow w Lipsku bydli?
B. Kiszka: Ze statistiskich wozjewjenjow wěm, zo je jich něhdźe 1 500 do 2 000 Polakow.
Nimo toho bydla tam Rusojo, Ukrainjenjo, Běłorusojo, Češa, Słowacy, Bołharojo, tež Serbja a dalši Słowjenjo.
Po přewjedźenju hižo dweju słowjanskeju nocow bě nam wědome, zo je trjeba z tajkimi kulturnymi zetkanjemi
pokročować. Z tutym a dalšimi projektami tworimy platformu słowjanskim wuměłcam. Zapřijimujemy při tym
wšelake słowjanske ludy a zmóžnjamy tak tež Němcam, njewobdźěleć so jenož pasiwnje, ale tež aktiwnje dožiwjeć
w měsće nad Plesnu słowjanskosć.
Kak słowjansku kulturu předstajeće?
B. Kiszka: Na dotalnymaj słowjanskimaj swjedźenjomaj wustupowachu chór Němsko-ruskeho zjednoćenstwa,
dalše kulturne słowjanske skupiny z Lipska, ale tež solisća-operowi spěwarjo.
Što smědźa wopytowarjo 3. słowjanskeje nocy nětko w Lipsku wočakować?
B. Kiszka: Swjedźeń zahaji so pjatk w 19 hodź. w kulturnym centrumje „Knicklicht“,
na Drježdźanskej dróze 79 w Lipsku-Reudnitzu. Dožiwić móža tam wšitcy zajimowani hosćo solistow-operowych
spěwarjow, bołharskeho akordeonista, dujerski orchester wohnjoweje wobory Lipsk, ruski chór Slawija,
pólsku kulturnu skupinu a dalšich.
Budu tež Serbja přitomni?
B. Kiszka: Na dotalnymaj zetkanjomaj wobdźělichu so studenća sorabistiki a dalši Serbja. Naš Pólski klub je k nim zwisk nawjazał. Nadźijam so, zo serbska studentska skupina raz na słowjanskej nocy w programje sobu skutkuje. My pak tež pjatk wječor rady serbske spěwy zasłyšimy, chce-li je tam něchtó zanjesć.